ഞരമ്പു രോഗികളുടെ കമന്‍റുകള്‍ കേട്ട് തളരരുത്: സാനിയ അയ്യപ്പന്
യുവതാരം സാനിയ അയ്യപ്പന് സോഷ്യല്‍ മീഡിയയില്‍ നിരവധി ആരാധകരാണുള്ളത്. ഗ്ലാമര്‍ ഫോട്ടോഷൂട്ടുകളുമായി ഈ കോവിഡ് കാലത്തും സോഷ്യല്‍ മീഡിയയില്‍ സജീവമാണ് സാനിയ. എല്ലാ വിഷയത്തിലും ശക്തമായ നിലപാടുകള്‍ ഉള്ള നടിയാണ് സാനിയ. സോഷ്യല്‍ മീഡിയ വഴിയുള്ള സൈബര്‍ ആക്രമണങ്ങള്‍ക്ക് അതേ രീതിയില്‍ തന്നെയാണ് സാനിയ മറുപടിനല്‍കുന്നത്.
“ഒരിക്കൽ ബംഗ്ളൂരു യാത്രയ്‌ക്കിടയിൽ ഷോട്സും ടോപ്പും ധരിച്ച് നിൽക്കുന്ന എന്റെ ചിത്രം ഫേസ്ബുക്കിൽ പോസ്റ്റ് ചെയ്തിരുന്നു. ഉടനെ ഫോട്ടോയ്ക്ക് താഴെ ഒരുവന്റെ കമന്റ് വന്നു: ”മണിക്കൂറിന് എത്രയാ റേറ്റ്?
പത്താം ക്ളാസിൽ പഠിക്കുന്ന സമയത്താണെന്ന് ഓര്‍ക്കണം. ഞാന്‍ ഉടനെ തന്നെ ഫേസ്ബുക്ക് ലൈവിൽ വന്ന് ആ ഞരമ്പ് രോഗിയെ പൊളിച്ചടുക്കി. മനുഷ്യനെന്ന് പോലും വിളിക്കാനാവാത്ത ഇത്തരം വിചിത്ര ജന്തുക്കളെ എന്ത് ചെയ്യണമെന്ന എന്റെ ചോദ്യത്തിന് സോഷ്യൽ മീഡിയ ഒറ്റക്കെട്ടായി മറുപടി പറഞ്ഞു: തല്ലിക്കൊല്ലണം.ഞരമ്പുരോഗികളുടെ കമന്റുകൾ കേട്ട് തളർന്നിരിക്കാതെ പ്രതികരിക്കുകയും പോരാടുകയുമാണ് പെൺകുട്ടികൾ ചെയ്യേണ്ടതെന്നാണ് എന്റെ പക്ഷം” ഒരു പ്രമുഖ മാധ്യമത്തിന് നല്കിയ അഭിമുഖത്തിലാണ് സാനിയ ഇത് പറഞ്ഞത്.
‘’എന്റെ മറുപടി കിട്ടാനാണ് മോശം കമന്റിട്ടതെന്ന് പിന്നീടയാൾ ക്ഷമ യാചിച്ച് കൊണ്ട് എന്നോട് പറഞ്ഞു.വിശന്ന് വലഞ്ഞപ്പോൾ ഭക്ഷണം മോഷ്ടിക്കേണ്ടി വന്ന മധു എന്ന പാവം ചേട്ടനെ തല്ലിക്കൊന്നവർ ഇത്തരം ഞരമ്പുരോഗികളെ തല്ലിക്കൊല്ലാനുള്ള മനസാണ് കാണിക്കേണ്ടത്.അങ്ങനെയേ നമ്മുടെ നാട് നന്നാവൂ.ഒരാൾ എന്ത് വസ്ത്രം ധരിക്കണമെന്നത് അയാളുടെ സ്വാതന്ത്ര്യമാണ്.എന്ത് വസ്ത്രം ധരിക്കുന്നുവെന്നതിലല്ല മറ്റുള്ളവർ അതെങ്ങനെ നോക്കിക്കാണുന്നു എന്നതിലാണ് പ്രശ്‌നം.കാഴ്‌ചപ്പാടാണ് മാറേണ്ടത്.മോഡേൺ വസ്ത്രം ധരിക്കുന്ന പെൺകുട്ടികളെല്ലാം മോശക്കാരാണെന്ന ധാരണയും മാറണം” സാനിയ പറഞ്ഞു.
