മഞ്ജുവിന്റെ കന്നഡ അരങ്ങേറ്റം യോഗേഷിനോപ്പം
ധനുഷ് നായകനായ അസുരൻ എന്ന ചിത്രത്തിലൂടെയായിരുന്നു മഞ്ജു വാര്യർ തമിഴകത്ത് അരങ്ങേറുന്നത്. ചിത്രത്തിലെ പച്ചൈയമ്മ എന്ന കഥാപാത്രം വലിയ കൈയ്യടി നേടുകയും ചെയ്തു. ഇപ്പോഴിതാ മഞ്ജു വാര്യർ കന്നഡ സിനിമയിലേക്കും അരങ്ങേറാൻ ഒരുങ്ങുകയാണെന്ന റിപ്പോർട്ടുകളാണ് പുറത്ത് വരുന്നത്. കന്നഡ മാധ്യമങ്ങളാണ് ഇതു സംബന്ധിച്ച റിപ്പോർട്ടുകൾ പുറത്ത് വിട്ടിരിക്കുന്നത്. ലൂസ് മാട ഫെയിം യോഗേഷിനൊപ്പമാണ് കന്നഡയിലേക്ക് മഞ്ജു വാര്യർ അരങ്ങേറുന്നതെന്നാണ് റിപ്പോർട്ടുകൾ സൂചിപ്പിക്കുന്നത്. ലൂസ് മാട യോഗി എന്നാണ് സാൻഡൽ വുഡിൽ യോഗേഷ് അറിയപ്പെടുന്നത്. അക്കട്ടക്കട്ട എന്നാണ് ചിത്രത്തിന് നൽകിയിരിക്കുന്ന പേരെന്നും റിപ്പോർട്ടിൽ പറയുന്നുണ്ട്.
ചിത്രത്തിൽ യോഗേഷ് അവതരിപ്പിക്കുന്ന കഥാപാത്രത്തിന്റെ അമ്മ വേഷത്തിലാണ് മഞ്ജു വാര്യരെ പരിഗണിക്കുന്നത്. നാഗരാജ് സോമയാജിയാണ് ചിത്രം സംവിധാനം ചെയ്യുന്നത്. ഈ കഥാപാത്രം വളരെ ശക്തയാണെന്നും മഞ്ജു വാര്യർക്ക് ഈ കഥാപാത്രം നന്നായി ഇണങ്ങുമെന്നും അവർക്ക് നന്നായി അവതരിപ്പിക്കാനാകുമെന്നും പ്രതീക്ഷിക്കുന്നതായി നാഗരാജ് പറഞ്ഞതായാണ് റിപ്പോർട്ട്.
കൊവിഡ് ലോക്ക് ഡൗണിൽ ഇളവുകൾ ഉണ്ടായ ശേഷം മഞ്ജു വാര്യരെ നേരിൽ കണ്ട് ചിത്രത്തിന്റെ കഥ പറയാനുള്ള ഒരുക്കത്തിലാണ് സംവിധായകൻ. ചിത്രത്തിന്റെ കഥ കേട്ടപ്പോൾ തന്നെ സിനിമ ചെയ്യാമെന്ന് യോഗി പറഞ്ഞതായും എല്ലാം ഭംഗിയായി മുന്നേറിയാൽ മഞ്ജു വാര്യരുടെ കന്നഡ സിനിമയിലേക്കുള്ള അരങ്ങേറ്റം ഇതിലൂടെയാകുമെന്നും സംവിധായകൻ പറയുന്നു.